Posibleng bumaba ng hanggang sampung porsyento ang singil sa kuryente kapag tuluyang inalis ang system loss charges na ipinapasa sa mga consumer.
Ayon kay Energy Undersecretary Mario Marasigan, maaaring makatipid ang mga consumer ng hindi bababa sa 5% hanggang 10%, depende sa halaga ng system loss na kasalukuyang sinisingil sa bawat kilowatt-hour.
Kasunod ito ng direktiba ni Pangulong Ferdinand Marcos Jr. sa kaniyang SONA na itigil na ang pagpapasa ng system loss charges at ang pagpapataw ng VAT o value-added tax sa naturang singil.
Tiniyak naman ni Energy Secretary Sharon Garin na makikipagpulong ang ahensya sa Energy Regulatory Commission at National Electrification Administration upang ihanda ang pagpapatupad ng nasabing direktiba.
Ngunit maaari anya itong abutin ng hanggang isang taon dahil sa kinakailangang pag-upgrade ng imprastraktura ng mga electric cooperative at distribution utilities.—sa panulat ni Jordan Gutierrez
