Naniniwala si National Bureau of Investigation (NBI) Regional Director Atty. Jeremy Lotoc, na bilang isang abogado, alam ni Vice President Sara Duterte na maaaring magdulot ng criminal liability ang kaniyang mga pagbabanta laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Iginiit ni Lotoc, na sa halip na itanggi ni VP Sara ang kaniyang mga sinabi sa online conference noong November 2024 ay lalo pa aniyang pinagtibay ni VP Sara ang kaniyang mga pahayag.
Ayon kay Lotoc, ang ganitong pag-amin o admission against interest ay may malaking bigat sa ilalim ng batas dahil bihirang umamin ang isang tao sa bagay na maaaring makasama sa sarili niyang kaso.
Sinabi ni Lotoc na kung itinanggi o nilinaw ni VP Sara ang kaniyang mga pahayag, posibleng iba ang naging pagsusuri at direksyon ng pagsisiyasat ng NBI.
Ipinunto ng opisyal na abogado ang pangalawang pangulo at batid nito na sa sandaling bigkasin niya ang naturang mga pagbabanta ay maaari siyang mapanagot sa ilalim ng batas.
Paliwanag ni Lotoc, m pinarurusahan ng batas ang grave threats kahit hindi ito humantong sa aktuwal na pananakit upang mapanatili ang kapayapaan at maiwasan ang kaguluhan sa lipunan.
Una nang inirekomenda ng NBI ang pagsasampa ng tatlong bilang ng grave threats at isang bilang ng inciting to sedition laban sa bise presidente. | Geli Mendez (Patrol 30)
