Mariing pinabulaanan ng House prosecution panel ang pahayag ni Vice President Sara Duterte na nalululong sa pulitika ang pamahalaan habang nagpapatuloy ang impeachment trial sa Senado.
Sa pulong-balitaan, sinabi ni House prosecutor at Bicol Saro Party-list Rep. Terry Ridon na hindi totoo ang mga paratang na nakatuon lang sa pulitika ang pamahalaan dahil patuloy na nagpapatupad ang gobyerno ng mga programa para sa ekonomiya at paghahatid ng serbisyo publiko.
Ayon kay Ridon, kabilang sa mga hakbang ng pamahalaan ang pagtutok sa mga isyung pangkabuhayan, pagtaas ng sahod sa iba’t ibang rehiyon, at pagtiyak na maramdaman ng mga Pilipino ang benepisyo ng paglago ng ekonomiya.
Aniya, maraming interventions na ginagawa ang pamahalaan para tutukan ang iba’t ibang usapin na kinakaharap ng ating bansa.
Para naman kay House prosecutor at Manila Rep. Joel Chua, matagal nang hinihintay ng publiko na direktang sagutin ng bise presidente ang mga isyung ibinabato laban sa kanya, kabilang ang usapin tungkol kay “Mary Grace Piattos” at ang mga alegasyong nakasaad sa impeachment complaint.
Hinamon din ni Chua si VP Sara na ipaliwanag ang umano’y P6.7 billion na transaksyon na binanggit sa mga rekord ng Anti-Money Laundering Council (AMLC).
Ito aniya ang dapat na sinasagot ng pangalawang pangulo sa halip na sabihing namumulitika lang ang House prosecution panel. | via Geli Mendez (Patrol 30)
