Sinuspinde ng Office of the Ombudsman si Catanduanes Vice Governor Robert Fernandez at 11 miyembro ng Sangguniang Panlalawigan sa loob ng anim na buwan nang walang sahod.
Ayon sa Ombudsman, may sapat na ebidensya laban sa mga opisyal kaugnay ng umano’y maling paggamit ng P30.5 milyong Quick Response Fund (QRF) matapos ang pananalasa ng Super Typhoon Uwan noong 2025.
Batay sa reklamo ni Governor Patrick Alain Azanza, binago umano ng mga opisyal ang plano ng paggamit ng pondo at inilaan ang malaking bahagi nito para sa cash assistance imbes na relief goods.
Sinabi rin ng gobernador na naantala ang pagtulong sa mahigit 39,000 pamilyang naapektuhan ng bagyo dahil sa mga hakbang ng mga suspendidong opisyal.
Ayon sa Ombudsman, kinakailangan ang suspensyon upang hindi maapektuhan ang imbestigasyon at mapangalagaan ang mga dokumento at ebidensya ng kaso.
