Nagpaalala ang Department of Labor and Employment sa mga private sector employer hinggil sa tamang pasahod tuwing Pasko o Disyembre 25, na itinuturing na regular holiday sa ilalim ng Labor Code.
Ayon sa DOLE, ang mga empleyadong hindi pumasok sa araw ng Pasko, may karapatan pa ring tumanggap ng 100% ng kanilang arawang sahod, basta’t pumasok sila o naka-paid leave sa araw ng trabaho bago ang holiday.
Para naman sa mga empleyadong pumasok ngayong Pasko, dapat bayaran ng employer ang katumbas ng 200% ng basic wage para sa unang walong oras ng trabaho.
Samantala, nilinaw ng DOLE na kung tumapat ang Pasko sa rest day ng empleyado at siya ay pumasok, may karagdagang 30% ang 200% holiday pay, habang ang overtime naman may dagdag pang 30%.
