Nanawagan ang Department of Environment and Natural Resources na iwasang magkalat ngayong Pasko.
Ayon sa DENR, mainam para sa mga pamilyang Pilipino na sundin ang limang “R” ng waste management, o ang “Refuse, Reduce, Reuse, Repurpose, and Recycle,” lalo na’t mas maraming basura ang nako-kolekta tuwing Kapaskuhan.
Pinapayuhan din ng kagawaran ang mga Pilipino na:
- Gumamit ng mga reusable na container at iwasan ang mga single-use na paper at plastic items;
- Mag-recycle ng dyaryo, magazine, o scrap paper bilang pambalot ng regalo;
- Itabi ang mga pamaskong dekorasyon upang magamit sa susunod na taon;
- Magdala ng eco-bag sa pamimili o pagdadala ng take-out mula sa handaan; at
- Iwasan ang food waste sa pamamagitan ng pagpaplano sa dami ng pagkaing ihahanda at sa wastong pagtatabi ng mga natira para sa mga susunod na araw.
Sa pamamagitan nito, umaasa ang DENR na mapoprotektahan ng bawat Pilipino ang kalikasan habang nananatiling maligaya ang Pasko at Bagong Taon.
