Nanawagan ang asawa ni Pharmally Pharmaceutical Corporation Director Lincoln Ong sa senado na palayain na ang kanyang mister upang madalaw ang anak nilang na-dengue.
Nakasaad ang naturang hiling sa liham na ipinadala ng misis ni Ong na si Summer, kay Senator Richard Gordon, Chairman ng Senate Blue Ribbon Committee.
Kinumpirma ng tanggapan ni Gordon na natanggap nila ang request noong Lunes, Pebrero a-14.
Umaasa si Ginang Ong na diringgin ng senado ang kanyang hiling lalo’t laging hinahanap ng kanilang dalawang taong gulang na anak ang ama nitong nawalay.
Hindi umano maayos ang kalusugan ng kanilang anak at nangangamba siyang hindi na nito makita ang ama kung anuman ang mangyari ritong masama.
Kasalukuyang nakapiit ang Pharmally Official sa Pasay City Jail dahil sa kabiguang ilabas ang financial documents ng kumpanya na ipina-subpoena noong imbestigahan ng senado ang umano’y iregularidad sa pagbili ng gobyerno ng pandemic supplies.
