Patuloy na nagsasagawa ng mga operasyon ang Philippine Drug Enforcement Agency (PDEA) katuwang ang Philippine National Police (PNP) para labanan ang iligal na droga sa bansa.
Ayon kay PDEA Dir. Gen. Wilkins Villanueva, nakapagtala ang kanilang ahensya ng mahigit 315,635 na indibidwal ang naaresto matapos ilunsad ang anti-illegal drug operations.
Nabatid na nasa 6,215 ang bilang ng mga namatay sa ikinasang 218,665 na anti-narcotics operation.
Sinabi pa ni Villanueva na nakapagtala din ang kanilang ahensya ng 13,821 na nasa high value targets ang naaresto, bukod pa sa 3,785 na target-listed suspects, 1,422 drug den maintainers, 795 drug group leaders at members, 509 government employees, 393 elected officials, 349 foreigners, 284 na nasa wanted lists, 124 uniformed personnel, 75 armed group members at 24 prominent personalities.
Sa ngayon, nasa 23,270 ng 42,045 barangay sa bansa ang idineklarang drug-cleared base sa real numbers data na inilabas ng pdea sa pagsisimula ng administrasyong Duterte.
Nangako naman ang PDEA na kanilang paiigtingin ang kanilang war on drugs pagpasok ng bagong taon. —sa panulat ni Angelica Doctolero
