Pinakukonsidera ng National Telecommunications Commission (NTC) sa Department of Public Works & Highways (DPWH) ang mungkahing amiyendahan ang mga umiiral na regulasyon at patakaran hinggil sa right-of-way salig sa Department Order 73 series of 2014.
Sa liham ng NTC kay DPWH Secretary Mark Villar, sinabi nito na ang nasabing probisyon kasi ang sanhi ng pagkaantala para sa pagtatayo ng kanilang mga pasilidad ang mga TelCo sa buong bansa partikular na ang critical backbone at last mile connectivity.
Iginiit ng NTC na ang kanilang panawagan ay pagtalima na rin sa direktiba ni Pangulong Rodrigo Duterte sa mga TelCo na bilisan ang pag-upgrade sa kanilang serbisyo bago matapos ang taon lalo’t tumaas ang internet usage sa bansa mula nang manalasa ang COVID-19 Pandemic.
Nakasaad kasi sa DPWH D.O. no.73 na pinagbabawalan ang paglalagay ng poste para sa cable ng telepono at mobile service providers sa kahabaan ng national roads.
“D.O. 73 required phone, mobile, and cable service providers and their contractors to acquire their own right-of-way and directed DPWH Regional and District Engineers to remove all those declared prohibited uses of the right-of-way. Right-of-way includes areas of the national road such as sidewalks, gutters and canals,” saad ng NTC.
Magugunitang lumagda ng isang Memorandum of Agreement (MOA) ang Department of Information and Communications Technology (DICT), DPWH at NTC para amiyendahan o baguhin ang kautusan para sa pagpapalawak ng telecommunication services at facilities sa bansa at epektibong maipatupad ang ICT infrastructure.
Isinagawa ang Technical working group (TWG) meetings, na pinangunahan ng DPWH matapos lagdaan ang MOA sa First Philippine Telecoms Summit noong 2017.
Ang TWG ay kinabibilangan ng mga kinatawan mula sa DICT, NTC, telcos, cable operators, maging ng well DPWH officials, staff, district engineers at technical specialists.
