Bukas ang DOJ o Department of Justice na imbestigahan ang kontratang pinasok umano ng ahensiya sa security agency na pag-aari ng pamilya ni Solicitor General Jose Calida.
Ito ang tiniyak ni Justice Secretary Menardo Guevarra kasabay ng kanyang pagsalang sa Commission on Appointments kung saan naitanong ni Senador Kiko Pangilinan ang aksyon na gagawin nito sa kontrobersiya.
Ayon kay Guevarra, bagama’t ipinapalagay na regular ang kontrata ng Vigilant Investigative and Security Agency Incorporated dahil dumaan ito sa bidding pero nararapat pa rin itong busisiin sakaling may makitang paglabag dito.
Gayunman sinabi ni Guevarra na tanging kontrata na lamang na nakuha ng DOJ ang masasaklaw ng kanilang pagrepaso at hindi nakasama ang kontrata sa iba pang ahensiya ng gobyerno.