Patuloy ang pag-angat ng industriya ng turismo sa bansa.
Ito ay ayon sa Department of Tourism (DOT) sa kabila na rin ng nakaambang pagsasara ng Boracay Island na isa sa nangungunang tourist spot sa Pilipinas.
Batay sa DOT, pumalo sa mahigit 600,000 mga dayuhang turista ang dumating sa Pilipinas sa buwan ng Pebrero, mas mataas sa naitalang mahigit 500,000 tourist arrivals sa bansa noong Pebrero ng nakaraang taon.
Sinabi naman ni Tourism Secretary Wanda Teo, maituturing na record high ang naitalang 1.4 milyong tourist arrivals sa unang dalawang buwan ng 2018.
Labing isang (11) porsyento aniya itong mataas kumpara sa mahigit 1.2 milyong turistang dumating sa Pilipinas sa kaparehong panahon ng 2017.
Dagdag ni Teo, nananatiling pinakamaraming sa bilang ng mga dumating na turista sa bansa ang mga Korean nationals, sinundan ng Chinese, mga Amerikano at Australian.
—-
