Minaliit ng Malakanyang ang pahayag ng senatorial candidate at abogadong si Jude Sabio kaugnay ng natanggap umano nitong banta.
Ayon kay Presidential Spokesperson Salvador Panelo, guni-guni lamang ni sabio ang anito’y warrant of arrest laban sa kanya dahil sa umano’y kakulangan sa kanyang Mandatory Continuing Legal Education (MCLE).
Aniya, nais lamang ni Sabio ipakilala ang sarili sa publiko dahil kumakandidato ito sa pagka-senador.
Binigyang diin ni Panelo, posibleng may kinalaman sa isinampang kasong kriminal laban kay Sabio ang warrant of arrest laban dito.
Una nang isiniwalat ni Sabio na kasalukuyan siyang nagtatago matapos na ipag-utos ng korte Sa Trece Martires, Cavite ang pagpapaaresto sa kanya dahil sa kakulangan sa kanyang MCLE.
Magugunitang si Sabio ang abogado ng self-confess hitman ng Davao Death Squad na si Edgar Matobato at nagsampa ng reklamo laban kay Pangulong Rodrigo Duterte sa International Criminal Court (ICC).
