Aalamin ni Bise Presidente Jejomar Binay ang tunay na sitwasyon sa bawat probinsya sa bansa.
Sinabi ito ni Atty. JV Bautista, kasunod ng pahayag ng mga kritiko ng Bise Presidente na hindi naman ito nagbigay ng solusyon sa mga problema ng bansa na tinukoy sa kanyang True State of the Nation Address.
Ipinaliwanag ni Bautista na mayroong nakahandang programa para sa bansa ang Bise Presidente, subalit nais nitong maging akma sa bawat probinsiya ang mga programang kanyang ipapatupad.
“Lilibot sa iba’t ibang parte ng bansa at ipakikita na lang sa mga taong payak, bubuo po siya ng magandang programa ng bawat isa, meron na siyang blue print eh.” Ani Bautista.
TSONA
Iginiit din ni Atty. JV Bautista na pinupuna lang ng mga kritiko ang ginawang True State of the Nation Address ng Bise Presidente, kahapon, dahil wala nang ibang isyu na maibato laban dito.
Sinabi ni Bautista na walang ibang choice si Vice President Jejomar Binay, kundi ihayag ang kanyang TSONA, dahil wala naman sa mga kaalyado ng Pangulong Noynoy Aquino, ang maglalahad ng tunay na estado ng bansa.
Binigyang diin din ni Bautista na hindi nagkulang ang Bise Presidente sa pagtulong sa paghahanap ng solusyon sa mga problema ng bansa.
“Eh, sino pa po kaya ang gusto nilang magsabi ‘nun, hindi nila kayang pabalintuanan itong mga sinabi ni VP sapagkat ‘yan po lahat ay katotohanan, so instead of meeting the issues ang ginagawa nila ay titirahin nila si VP tungkol sa mga bintang nila na hanggang ngayon ay wala naman pong nakikita pang probable cause diyan eh.” Pahayag ni Bautista.
