Walang nakikitang dahilan si Senate President Vicente “Tito” Sotto III para magsagawa ng loyalty check sa hanay ng majority senators.
Ayon kay SP Sotto, tiwala siya na matatag ang liderato ng Senado at hindi niya alam kung saan nanggagaling ang kumakalat na balita na may banta ng kudeta laban sa kanyang Senate leadership.
Sinabi rin ni SP Sotto na “entitled” ang sinuman sa kanilang opinyon sa harap ng mga sabi-sabi na kaya nagbitiw sa pwesto bilang Blue Ribbon Committee Chairman si Sen. Lacson ay para maisalba ang kanyang pagiging Senate President.
Nilinaw din ni SP Sotto na nagkausap na sila ni Senate Minority Leader Alan Peter Cayetano, na tiniyak sa kanya na wala itong kinakausap para mapalitan siya sa pwesto.
