Umarangkada na ngayong araw ang simultaneous coastal clean-up drive sa pangunguna ng Department of Environment and Natural Resources o DENR sa iba’t ibang bahagi ng rehiyon sa buong bansa.
Sa panayam kay Mr. Christopher Villarin, head ng Regional Public Affairs Office ng DENR National Capital Region sa programang ‘Balita Na Serbisyo Pa’, sinabi nitong layon ng nasabing programa na maitaas ang antas ng kaalaman ng mga Pilipino hinggil sa perwisyong dulot ng pagtatapon ng basura lalo na ang mga basurang gawa sa rubber o plastic sa ating mga baybaying dagat.
Ayon pa kay Villarin, numero unong nakukuhang basura sa mga estero, kanal at coastal area ay ang mga balat ng candy at iba’t ibang uri ng plastic.
Dagdag pa ni Villarin na marami na ring mga balyena at dugong ang namamatay dahil napagkakamalang damo ang mga lumulutang na plastic at ito’y kanilang nakakain.
Mula pa taong 2004 ay sumasali na ang Pilipinas sa International Coastal Clean-Up Drive na ginagawa sa iba’t ibang parte ng mundo.
Nagsimula ang nasabing programa ng alas-6:00 ng umaga na inaasahang lalahukan ng humigit kumulang 5,000 volunteers sa buong bansa.
Sa Metro Manila, nasa Roxas Boulevard ang sentro ng nasabing aktibidad.
(AR/ May ulat ni Aya Yupangco)