Drama at arte lang daw ang sinasabi nina Davao City Mayor Sara Duterte-Carpio at Special Assistant to the President Christopher “Bong” Go na walang silang ambisyon na maging Senador.
Ito ang paniniwala ni Senador Antonio Trillanes sa tila pagpapakipot umano ng dalawa sa pagtakbo sa pagka-Senador sa 2019 elections.
Ayon kay Trillanes ganito rin ang naging taktika ni Pangulong Rodrigo Duterte nuon kung saan paulit- ulit din niyang sinasabi na ayaw niyang tumakbo sa pagka Pangulo kahit matagal na itong planado.
Pagbubunyag pa ng Senador, batay umano sa kaniyang impormasyong nakuha, tatakbong Senador si Mayor Sara bilang paghahanda sa pagtakbo nito sa pagka Pangulo sa 2022.
Dagdag pa ni Trillanes, nais kasi umano ni Pangulong Duterte na manatili habambuhay na sa Malakaniyang kaya’t nagbabalak din na magdeklara ng martial law o kaya ay ipinababago ang konstitusyon.
Samantala, halatang-halata naman umano ang pag-iinarte at pagsisinungaling ni Go na hindi siya tatakbo gayung may mga billboard na ng mukha nito ang nakapaskil sa EDSA at sa iba pang bahagi ng bansa.
