Pumalo na sa 3,858 na bagong COVID-19 infections ang naitala ng Department of Health (DOH) kahapon.
Batay sa datos ng DOH, ito na ang pinakamataas na bilang simula noong Pebrero 10.
Sumampa rin sa 29,897 ang bilang ng active cases, na pinakamataas sa loob ng 16 na linggo o mula noong Abril 8.
Nadagdagan din ng 1,705 ang bilang ng mga gumaling na may kabuuang bilang na 3,673,745, habang 60,704 ang mga nasawi sa COVID-19.
Ang nationwide COVID-19 tally naman ay aabot na sa 3,764,346.
Ang mga rehiyong nanguna sa may pinakamaraming kaso sa nakalipas na dalawang linggo ay ang NCR na may 13,135 new cases, CALABARZON na may 8,504 at Central Luzon na may 3,923 bagong kaso.
