Makakatanggap ang mga public school teachers ng tatlong buwang halaga ng internet load sa pagpapatuloy ng distance learning sa gitna ng nararanasang pandemya sa darating na buwan ng Hunyo.
Ito ang kinumpirma ni Education Undersecretary Alain Pascua, magbibigay ang kagawaran ng connectivity load mula 30 gigabytes hanggang 35 gigabytes na halaga ng data kada buwan.
Aniya, para matanggap ng mga guro ang naturang connectivity load, kinakailangan lamang nilang magparehistro sa Department of Education (DepEd) Commons para maipadala sa kanilang cellphone.
Ipinabatid naman ni Education Undersecretary Annalyn Sevilla na naglalaan ang DepEd ng mahigit P1.2-bilyon para sa naturang programa.
Ito aniya ang kapalit sa unang plano ng kagawaran na P400 load allowance para sa mga guro.
Aniya, magsisimula ang pagroll-out sa naturang data sa buwan ng Hunyo. —sa panulat ni Rashid Locsin
