Handa sa epekto ng Omicron subvariant BQ.1 ang mga pribadong ospital sa Pilipinas.
Ito ang sinabi ni Dr. Jose Rene de Grano, presidente ng Private Hospitals Association of the Philippines Inc. (PHAPi), kasunod na pagka-detect ng 14 na kaso ng BQ.1 sa bansa.
Ayon kay de Grano, hindi magbabago ang paraan ng paghahanda ng mga ospital, gaya ng kanilang ginagawa nang magsimula ang pandemya.
Hangga’t mild at moderate ang epekto ng virus, sinabi ni de Grano na hindi magiging problema ang pagtugon.
Tangi aniyang problema ay ang kakulangan sa mga health workers lalo na ang mga nurses na mayorya ay pinili na lang na magtrabaho sa abroad.
Sa ngayon, pagtitiyak ng opisyal na makokontrol pa rin ang admission ng Covid-19 sa bansa dahil nanatiling nasa “low risk” ang paggamit ng mga ospital.
