Lumundag na sa 139 dollars per barrel ang presyo ng krudo sa international market sa gitna ng pangambang numipis ang suplay habang ikinukunsidera ng US at European Union na ipagbawal ang russian oil imports.
Mula sa dating 125 dollars kada bariles noong isang linggo, lumobo ang brent crude sa 139 dollars at 13 centavos.
Sumirit naman sa 130 dollars at 50 centavos ang kada bariles ng us west Texas intermediate habang ang Dubai crude, na karaniwang ginagamit sa Pilipinas, umabot na ang presyo sa 114 dollars per barrel.
Naalarma naman ang mga ekonomista sakaling tuluyang ipagbawal ng Amerika at European Union sa international market ang Russian oil imports at kung tatagal pa ang bakbakan ng Ukraine at Russia.
Ibinabala ng JP Morgan at World Bank na nameligrong pumalo sa 185 hanggang 200 dollars ang presyo ng krudo kung ipatutupad ang ban na maaaring magresulta sa global economic crisis at recession.
