Timbog ang anim (6) na miyembro ng Abu Sayyaf Group sa ikinasang operasyon ng militar sa bayan ng Tongquil sa lalawigan ng Sulu.
Kinilala ng Naval Forces Western Mindanao Command ang mga naaresto na sina Omar Amping, Gabby Juwa, Jadi Luhadi, Almicel Abdulla, Madi Jalilul at Sakkam Decani.
Ayon kay Rear Admiral Rene Medina, noong Lunes pa nila ikinasa ang naturang operasyon makaraang matanggap ang mga sumbong na may nangha-harass sa isang fishing boat sa Salumping Island sa Basilan.
Nasa ika-apat na most wanted criminal si Amping sa Zamboanga City at mayruong dalawang warrant of arrest laban sa kaniya dahil sa kasong murder.
—-
