Naglunsad din ng sarili nilang imbestigasyon ang Commission on Human Rights (CHR) sa kaso ng pagkamatay ni Cpl. Winston Ragos.
Ayon kay Atty. Jackie De Guia, tagapagsalita ng CHR, may ilang puntos na tila kailangang ipaliwanag ng Philippine National Police (PNP) hinggil sa pahayag nito na self defense ang ginawa ni p/Msgt. Daniel Florendo Jr.
Nakalulungkot aniya na isang dating sundalo na nag-alay ng sariling buhay para sa bayan na ginupo ng post-traumatic stress disorder ang namatay, hindi dahil sa COVID-19 kung hindi sa maling judgement call ng pulisya.
Gayunman, binigyang diin ni De Guia na kailangang linawin ng PNP kung talagang may dalang baril si Ragos taliwas sa pahayag ng pamilya nito na quarantine pass ang laman ng sling bag nito.
Kailangan ding busisiing maigi kung bakit kailangang humantong sa pagkamatay ng biktima gayung maaari namang pinaralisa muna ito upang maisailalim sa masusing imbestigasyon.