Handang-handa na ang Manila Police District sa pagbabantay sa nalalapit na kapistahan ng Jesus Nazareno, bukas, Enero 9.
Ito ang tiniyak ni MPD Spokesman Major Phillip Ines matapos gawin ang send-off ceremony sa lahat ng mga ahensya ng pamahalaan na magiging bahagi ng kapistahan.
Ayon kay Maj. Ines, inaasahan ng Philippine National Police na hihigit pa sa naitalang nasa walong milyong deboto noong 2025 ang daragsa sa nasabing pista.
Naka-deploy na rin anya ang nasa labinlimang libong pulis mula sa Maynila at mga karatig-lugar, at bahagi lamang ito ng pwersa ng mga uniformed services na makikilahok sa seguridad ng Traslacion ngayong taon.
Dagdag pa ni Maj. Ines, wala pa silang nababalitaang seryosong banta na maaaring ikagulo ng kapistahan, ngunit nakahanda anya ang pambansang pulisya na hindi ito magpapa-kampante sa pagkompronta sa mga posibleng banta sa seguridad.
Ang mahalaga anya, mairaos ang pagdiriwang nang mapayapa at walang malaking insidente, gaano man kahaba ang itatagal nito.
