Nanganganib na malugi ang Philippine Children’s Medical Center kung hindi mababayaran ang nasa P200 – M na ginastos nito para sa COVID tests ng mga umuwing Overseas Filipino Worker noong 2021 at 2022.
Batay sa report ng Commission on Audit, mahigit 62,000 tests ang isinagawa ng P.C.M.C. ang hindi nababayaran dahil sa kawalan ng mga dokumento.
Dahil dito, inatasan ng C.O.A. ang P.C.M.C. na ayusin ang mga dokumento upang mabayaran ito at maiwasan ang pagka-bangkarote.
Sa ilalim ng memorandum ng Department of Health, inatasan nito ang nasabing ospital na mangasiwa sa COVID tests sa mga OFW at ang gastos ay dapat ire-reimburse naman ng PhilHealth.
Gayunman, ilan sa mga dokumento na dapat gagamitin ng P.C.M.C. sa reimbursement ay kulang-kulang habang ang ibang form ay hindi mabasa at walang PhilHealth identification number ang ilan sa kumuha ng test.