Pangambang masaid ang tubig sa La Mesa dam pinawi

Itinanggi ni MWSS o Metropolitan Waterworks Sewerage System Administrator Reynaldo Velasco ang report na nasa kritikal na lebel na ang tubig sa La Mesa dam.

Sinabi ni Velasco na nananatiling normal ang lebel ng tubig sa dam, at posibleng nais lamang ng nagpakalat ng balita na maenganyo ang publiko na magtipid ng tubig.

Nakakatulong din aniya ang pag-ulan tuwing hapon at gabi para madagdagan ang suplay ng tubig sa dam, maliban pa sa pagdadagdag ng mga dam.

PAKINGGAN: Bahagi ng pahayag ni MWSS Administrator Reynaldo Velasco

Una nang nanawagan ang pamunuan ng La Mesa dam sa mga taga-Metro Manila at karatig lalawigan na magtipid sa tubig.

Ito ay matapos ilagay sa code red alert ang la mesa dam dahil sa pagbaba sa normal ng lebel ng tubig nito.

Batay sa ulat, bumagsak sa 78.4 meters ang antas ng tubig sa nasabing dam mula sa normal water level na 79.3 meters.

Kasunod nito, posibleng hinaan ang pressure sa distribusyon ng tubig sa ilang lugar sa Metro Manila bagama’t walang ipatutupad na water interruption.

By   Katrina Valle | Krista de Dios | Balitang Todong Lakas (Interview)

Comments

comments