Pananagutan ng Resorts World sinisilip na ng pamahalaan

Nagpaabot ng pakikiramay si Pangulong Rodrigo Duterte sa pamilya ng mga biktima ng pag-atake sa Resorts World Manila sa Pasay City.

Ayon kay Pangulong Duterte, hindi agad naka-responde ang mga awtoridad sa insidente dahil na rin sa kakulangan ng koordinasyon ng pamunuan ng casino.

Nakalulungkot aniya na nag-ugat lamang sa problema ng isang tao ang pagkamatay ng mahigit tatlumpung (30) biktima.

Bandang huli, inihayag ng Pangulo na maraming dapat ipaliwanag ang Resorts World at hindi pa rin ito ligtas sa mga kasong maaaring kaharapin.

PAKINGGAN: Bahagi ng pahayag ni Pangulong Rodrigo Duterte

NBI

Samantala, pasok na ang NBI o National Bureau of Investigation sa naging pag-atake sa RWM o Resorts World Manila na ikinasawi ng tatlumpu’t walo (38) katao.

Ayon kay Justice Secretary Vitaliano Aguirre, inatasan niya ang NBI na alamin kung may kriminal, civil o administrative liabilities ang pamunuan ng RWM at maging ang alinmang tanggapan ng gobyerno sa insidente.

Aniya, dapat na sampahan ng kaso kung sinuman ang mapatutunayang may sala base sa malilikom na ebidensya.

Una nang tinukoy na isang government employee na baon sa utang ang lone gunman na si Jessie Carlos na nasibak sa puwesto matapos na hindi ideklara sa kanyang SAL-N ang ilan sa kanyang mga pag-aari.

By Drew Nacino

Comments

comments