Walang kinalaman sa iligal na droga ang pananambang at pagpatay kay General Tinio Nueva Ecija Mayor Ferdinand Bote.
Batay ito sa inisyal na imbestigasyon ng Philippine National Police Regional Office 3.
Ayon kay PNP-Region 3 Director Chief Superintendent Amador Corpuz, hindi kasama sa narco-list ang pinaslang na alkalde at wala rin aniya itong natatanggap na anumang banta sa buhay.
Sinabi ni Corpuz, tatlong isyu ang kanilang tinitignan na posibleng motibo sa pagpatay kay Bote kabilang ang quarrying activity, politika at negosyo.
“Ang mga issues na tinitignan ngayon ay ‘yung quarry issues po sa Nueva Ecija, political issues lalong lalo na ngayon na marami nang nagpi-prepare para sa 2019 elections, pangatlo po ay tungkol sa negosyo ng pamilya sa projects at mga construction business. Sa initial investigation po namin wala pong relasyon to anything about drugs.” Ani Corpuz
Dagdag ni Corpuz, kanilang patuloy na nire-review at isinasailalim sa video enhancement ang kuha ng CCTV ng National Irrigation Administration o NIA sa pag-asang matukoy ang mga salarin.
Aniya, posibleng sinundan na mga suspek ang sasakyan ni Bote at hinintay na lamang itong lumabas ng NIA.
“Nire-review po namin ang CCTV footages, may tinigtignan tayong tatlong suspects na nakasakay sa motorsiklo kaya lang medyo nakalikod at naka-side, ini-enhance po natin ‘yan sa ngayon.” Pahayag ni Corpuz
(Balitang Todong Lakas Interview)
