Muling tiniyak ng National Water Resources Board (NWRB) na hindi makararanas ng krisis o kakulangan sa suplay ng tubig ang kalakhang Maynila.
Sa pahayag ni NWRB Executive Director Dr. Sevilla David, Jr., walang inaasahang water interruption sa Metro Manila dahil hindi nagbago o nabawasan ang alokasyon ng tubig mula sa Angat Dam.
Bukod pa dito, nakatulong din aniya ang panaka-nakang pag-ulan nitong nakalipas na araw upang hindi mabawasan ang lebel ng tubig sa mga dam.
Ayon sa PAGASA Weather Bureau, kahapon, aabot sa 194.02 meters ang water level ng nasabing dam kaya malayo ito sa critical level na 160 meters.
Umaasa naman ang NWRB na masisimulan na ang pagsasagawa ng cloud seeding operations upang makatulong sa pagpapaangat ng lebel ng tubig ng mga dam sa bansa. —sa panulat ni Angelica Doctolero