Itinaas na sa alert level 2 status ang Mt. Kanlaon sa Negros.
Ayon sa Philippine Institute of Volcanology and Seismology o PHIVOLCS, ito ay matapos maitala sa kanilang monitoring ang kabuuang 279 na pagyanig ng bulkan sa nakalipas na 24 oras.
Sinabi ng PHIVOLCS na magmula noong Agosto ay patuloy na tumataas ang volcanic earthquakes sa Mt. Kanlaon.
Bagamat walang naitalang pagbuga ng usok sa Mt. Kanlaon ngayong taon posible pa rin ayon sa PHIVOLCS na magkaroon ng phreatic eruption ang bulkan.
Dahil dito, nagtalaga na ng 4-kilometer radius permanent danger zone o PDZ ang mga awtoridad sa paligid ng bulkan kung saan bawal itong pasukin ng publiko.
Posible rin umanong makaapekto ang aktibidad ng bulkan sa mga eroplano kaya kinakailangang magbigay rin ng paalala ang Civil Aviation Authority of the Philippines o CAAP sa kanilang mga piloto.
Tiniyak ng PHIVOLCS na patuloy silang naka-monitor sa bulkan.
Notice of Alert Level Raise at Kanlaon Volcano:https://t.co/lag0juWVM0 pic.twitter.com/EkhwBoSqoS
— PHIVOLCS-DOST (@phivolcs_dost) November 15, 2017
—-