Binisita ng medical team ng mababang kapulungan ng Kongreso si Bureau of Customs (BOC) Commissioner Nicarnor Faeldon sa ospital, Huwebes ng 9:30 ng umaga.
Kasama sa nagtungo sa Manila East Medical Center sa Taytay Rizal si House Sergeant at Arms Ronald Detabali at tatlong doktor mula sa House Medical Department.
Ayon kay Detabali, kanilang naka-usap ang attending physician ni Faeldon at nakakuha na rin ng medical records nito.
Sinabi pa ni Detabali na kanila ring personal na nakausap si Faeldon na nakalabas na ng ICU at bagama’t naka-dextrose ay nanatiling masigla.
Nakatakda na rin aniyang lumbas ng ospital si Faeldon pero pinayuhang magpahinga muna ng tatlong araw bago bumalik sa trabaho at humarap sa pagdinig ng Kongreso.
