Pinatawan ng Office of the Ombudsman ng isang taong suspension ang alkalde at bise alkalde ng bayan ng Asingan sa Pangasinan dahil sa paglalagay ng mga ito ng kanilang pangalan sa ambulansya na pag-aari ng lokal na pamahalaan.
Batay sa inilabas na desisyon ng Ombudsman, kinatigan nito ang reklamo ni Asingan Councilor Evangeline Dorao laban kina Asingan Mayor Heidee Chua at Vice Mayor Carlos Lopez Jr. na paglabag sa code of conduct and ethical standards for public officials.
Inireklamo ni Durao ang paglalagay umano ng dalawang opisyal ng kanilang mga pangalan sa mga bagong biling ambulansya sa kanilang bayan gayundin sa mga government projects at properties kabilang ang pamamahagi ng mga bags sa mga public schools.
Samantala, sa isang panayam kay Vice Mayor Lopez, sinabi nito na nakahanda siyang bumaba sa puwesto sa oras na isilbi sa kanya ang suspension order ngunit i-aapela niya ang desisyong inihatol sa kanila.
—-
