Patuloy na binabantayan sa Marawi City, Lanao del Sur ang Armed Forces of the Philippines (AFP) ang posible pang banta mula sa mga terror group ngayong holiday season.
Ayon kay Colonel Romeo brawner, Deputy Commander ng Joint Task Force Ranao, hindi nila isinasantabi ang posibilidad na may mga galamay pa ng Maute – ISIS sa lungsod kaya’t lagi silang naka – alerto.
Aminado si Brawner na kahit mahirap ay sanay na silang hindi kapiling ang pamilya sa pagdiriwang ng Pasko at Bagong Taon dahil bahagi na ng tungkulin ng isang sundalo ang protektahan ang bansa sa lahat ng oras.
Gayunman, nakapagdiriwang pa rin naman ang ilang sundalo kapag holiday season sa pamamagitan ng makabagong teknolohiya tulad ng video call upang makita ang kani – kanilang mga pamilya.
AFP susunod pa rin sa holiday ceasefire
Tiniyak ng Armed Forces of the Philippines o AFP na susundin pa rin nila ang ikalawang bahagi ng idineklarang ceasefire sa New Peole’s Army (NPA) na epektibo mula sa Sabado hanggang Martes.
Ito’y sa kabila ng ginawang paglabag ng NPA sa idineklarang tigil – putukan matapos tangkaing dukutin ang isang citizen active auxiliary sa Davao Oriental at pangha-harrass sa isang army detachment sa Compostella Valley sa mismong araw ng Pasko.
Ayon sa ulat ni 10th Infantry Division Spokesperson Captain Jerry Lamosao, 30 mga miyembro ng NPA sa pamumuno ni Ka Jekol at Ka Ramie ang nagtangkang dumukot sa Citizen Armed Force Geographical Unit (CAFGU) na si Arbilito Catampao sa Tarragona, Davao Oriental.
Samantala, hindi naman matukoy ang bilang ng NPA na miyembro ng Guerilla Front ang umatake sa naturang army detachment sa Laak, Compostella Valley.
Agad namang nakaganti ng putok ang tropa ng pamahalaan na nagresulta ng pag – atras ng kalaban matapos ang dalwang minutong palitan ng putok.