Tiniyak ng Philippine Consulate General sa Dubai ang patuloy na paggawa ng paraan para mahanap at maibalik sa bansa ang mga labi ng Overseas Filipino Worker o OFW na si Febie Layug Guzman.
Ayon kay Consul General Paul Raymund Cortes, nais nilang siguruhin sa Guzman Family ang mahigpit na pakikipag ugnayan sa mga otoridad doon para mabatid ang tunay na dahilan nang pagkamatay ng Pinay OFW at mai-uwi sa bansa ang labi nito sa lalong madaling panahon.
Ipinaabot din ni Cortes ang pakiki-dalamhati sa pamilya ni Guzman.
Magugunitang inireklamo ng asawa ni Guzman ang maling labi na nakuha nito at nangangamba ang pamilya ni Guzman na posibleng nadala sa Indonesia ang labi nito sa halip na sa kaniyang hometown sa Pampanga.
By Judith Larino
