Magpapakalat ng mahigit siyamnalibong pulis ang Philippine National Police sa isasagawang “Trillion Peso March” sa EDSA People Power Monument, sa Nobyembre a-trenta.
Ayon sa PNP, ang nasabing bilang ng deployment ay bubuuin ng mahigit pitonglibong pulis mula sa Civil Disturbance Management Units, at mahigit isanlibong reactionary standby support force.
Kabilang sa tututukan ng mga pulis ang crowd control, negotiation, monitoring, at rapid response operations.
Sinabi ni Acting PNP Chief Lt. Gen. Jose Melencio Nartatez Jr. na kinakailangan ding magpatupad ng heightened alert upang mapanatili ang kapayapaan at kaayusan sa isasagawang rally.
Pinahintulutan ang pagsasagawa ng rally sa EDSA People Power Monument hanggang alas-otso ng gabi at inaasahang dadagsain ito.
