Tiniyak ni Senador Panfilo Lacson na ilalantad niya sa susunod na pagdinig ng Senate Blue Ribbon Committee ang listahan ng mga taga-Bureau of Customs na di umano’y tumatanggap ng payola o tara.
Ayon kay Lacson, beripikado na niya ang mga pangalan sa listahan at karamihan kung hindi man lahat ay kumpirmadong nasa tumatanggap ng payola kapalit ng mas mabilis na pagpapalabas ng kargamento.
Ilan aniya sa mga pangalang nasa listahan ay tugma sa naging testimonya ng broker na si Mark Taguba.
Gayunman, kumbinsido si Lacson na pinili lamang ni Taguba ang mga pangalang inilantad nito sa Senado at maging sa Kongreso.
Bagamat beripikado aniya ang listahan, aminado si Lacson na ibang usapan naman kung kakayaning patunayan sa korte o may sapat na ebidensiya para patunayan ang pagtanggap ng payola ng BOC officials.
By Len Aguirre
