Napatay ng mga tropa mula sa Armed Forces of the Philippines (AFP) ang tatlong mga miyembro ng New People’s Army (NPA) sa mismong araw ng Pasko kahapon.
Ito’y kasunod ng isinagawang air strike ng mga sundalo sa kuta ng mga rebelde sa bahagi ng daguma mountain range sa Sultan Kudarat.
Ayon kay M/Gen. Juvymax Uy, Commander ng 6th Army Division ng Joint Task Force Central, may natanggap silang impormasyon mula sa lokal na pamahalaan hinggil sa presensya ng mga rebelde sa nasabing lugar.
Dahilan ito upang agad silang magkasa ng operasyon gamit ang mga bagong kagamitan ng militar partikular na ang GPS guided smart bomb mula sa kanilang fa-50 fighting jet.
Matapos ang air strike, sinundan ito ng ground assault ng militar na nagresulta sa pagkakadiskubre ng kuta ng mga rebelde sa sitio kalumutan na nasa hangganan ng mga bayan ng Palimbang, Lebak, Kalamansig at Sen. Ninoy Aquino.
Ayon pa kay Uy, nabatid na ang presensya ng mga napatay na rebelde ay bilang paghahanda sa ika-52 anibersaryo ng Communist Party of the Philippines (CPP) ngayong araw.