Bumuo na ang kampo ni Chief Justice Maria Lourdes Sereno ng legal team para sa kanyang magiging depensa matapos ideklara ng Kamara na sufficient in substance ang impeachment complaint ni Atty. Larry Gadon laban sa punong mahistrado.
Ayon kay Atty. Carlo Cruz, tagapagsalita ng defense team, kinuha ng kanilang kampo ang serbisyo ni Atty. Alexander Poblador upang pangunahan ang lupon ng mga abogado na magtatanggol kay Sereno.
Si Poblador ay founding partner ng Poblador-Bautista and Reyes Law Firm at nagtapos bilang Cum Laude sa University of the Philippines noong 1974 at top 3 sa 1978 Bar Examination.
Naging abogado rin si Poblador ni Senador Grace Poe sa disqualification case nito nang kumandidato sa pagka-Pangulo noong isang taon.
Tumayo rin si Attorney Poblador bilang tagapagtanggol ni Senador Ping Lacson nang maharap ito sa 2 counts of murder kaugnay sa pagpatay sa dating PR man na si Salvador “bubby” Dacer at driver nitong si Emmanuel Corvito.
Ulat ni Bert Mozo
SMW: RPE
