Lumahok na sa unang pagkakataon ang Japan sa maritime humanitarian exercises 2015 na isinasagawa sa Pilipinas sa gitna ng lumalawak na pananakop ng China sa West Philippine Sea.
Isang Japanese navy replenishment ship ang nasa Subic Bay, Zambales para sa refueling ng US Navy Floating Hospital na patungong Vietnam para sa humanitarian mission.
Ayon kay US Seventh Fleet’s Task Force 73 Commander, Rear Admiral Charles Williams, nagiging regular na bahagi na ng military drills ang humanitarian assistance at disaster relief exercises sa military exercises sa Pilipinas.
Ang presensya aniya ni Japan Self-Defense Forces Chief, Admiral Katsutoshi Kawano sa Pilipinas ay indikasyon na seryoso ang puwersa ng mga Hapones na maging bahagi ng multilateral engagement.
Karagdagang military exercises
Samantala, nagpahayag ng interes ang Japan Self-Defense Forces o JSDF na maglunsad ng karagdagang military exercises kasama ang Armed Forces of the Philippines o AFP.
Ayon sa Department of National Defense (DND), nais ni JSDF Chief Admiral Katsutoshi Kawano na magkaroon pa ng amphibious landings at amphibious operations katuwang ang AFP.
Kabilang sa mga aktibidad ni Kawano sa pagbisita nito sa Pilipinas ang pag-obserba sa operasyon ng Pacific Partnership 2015 na pinangungunahan ng humanitarian assistance mission ng Amerika.
Bagaman pumabor si Defense Secretary Voltaire Gazmin, aminado itong kailangan pang bumalangkas ng Visiting Forces Agreement (VFA) kung magsasagawa ang Pilipinas at Japan ng mga naturang aktibidad.
By Drew Nacino
