Pinagbabaril ng mga hinihinalang miyembro ng New People’s Army o NPA ang isang military outpost sa North Cotabato, Martes ng gabi.
Ayon kay Lt. Col. Harold Argamosa, commander ng 39th Infantry Battalion ng Philippine Army dakong 10:15 nang inatake ng mga rebelde ang army at CAFGU detachment sa bayan ng President Roxas.
Agad namang gumanti ng putok ang militar at tumagal ang labanan ng halos isang oras.
Batay sa mga nakuhang basyo ng mga bala, matataas na kalibre ng mga baril ang ginamit ng mga rebelde.
Wala namang naiulat na nasawi sa magkabilang panig.
Ito na ang ika-apat na naitalang pag-atake ng NPA simula nang ideklara ni Pangulong Rodrigo Duterte ang martial law sa Mindanao.
By Krista De Dios
