Inaresto ng mga awtoridad sa California ang 28-anyos na Pilipinong green card holder matapos itong magpadala ng pera sa mga hinihinalang kasapi ng grupong ISIS.
Kinilala ng US Department of Justice ang suspek na si Mark Lorenzo Villanueva, na nahaharap sa kasong attempting to provide material support to a foreign terrorist organization.
Nakita sa listahan ng isang money transfer firm na nagpadala si Villanueva ng $1,615 sa loob ng limang buwan sa dalawang intermediaries.
Ayon sa US DOJ, sinabi ni Villanueva na nais nitong suportahan ang ISIS at maging bahagi ng grupo.
Nagpahayag naman ang Department of Foreign Affairs ng kahandaang magbigay ng konsular at legal na tulong kay Villanueva.
—Sa panulat ni Jem Arguel
