Tiyak na maaapektuhan ang kita ng Bureau of Customs sakaling suspendihin muli ang pagpataw ng excise tax sa LPG at kerosene.
Ito ang inamin mismo ni Customs Commissioner Ariel Nepomuceno sa harap ng panibagong malakihang dagdag-presyo sa produktong petrolyo bunsod ng tumitindi na namang gulo sa Gitnang Silangan.
Ayon kay Commissioner Nepomuceno, tiyak na apektado ang kanilang koleksiyon kung suspendihin muli ang koleksiyon ng excise tax, lalo’t itinaas pa ng pitong bilyong piso ang quota ng kawanihan.
Gayunman, kumpiyansa si Nepomuceno na makakahanap sila ng iba pang posibleng pagkukunan ng buwis bilang kapalit nito.
Bagaman dati na aniyang sinuspinde ang excise tax sa LPG at kerosene, nagawa pa rin nilang malagpasan ang kanilang collection target dahil sa mas mahigpit na assessment upang maiwasan ang misclassification ng mga kargamentong pumapasok sa bansa.
