Binalaan ni Cagayan Governor Manuel Mamba ang mga mayors na wala sa kanilang hurisdiksyon sa sandaling tumama sa lalawigan ang Bagyong ‘Ramon’.
Ginawa ni Mamba ang babala matapos matuklasan na anim sa 29 na alkalde ng Cagayan ang missing in action sa kasagsagan ng paghahanda nila sa pagdating ng bagyo.
Napag-alamang tatlo sa mga ito ang nasa Metro Manila samantalang sa kapitolyo ng Cagayan sa Tuguegarao naman umano nanatili ang tatlong iba pa.
Agad inatasan ni Mamba ang mga mayors na magbalik agad sa kani-kanilang bayan.
Batay sa pagtaya ng PAGASA, inaasahang mararamdaman ang hagupit ng Bagyong ‘Ramon’ sa Isabela at Cagayan sa Sabado hanggang Linggo.
