Nararamdaman mo ba ang madalas na pag-ihi, labis na uhaw, at tila walang katapusang pagkagutom?
Maaaring hindi mo lang ito basta pagod o init ng panahon baka ito’y maagang senyales ng diabetes.
Kapag mataas ang asukal sa dugo, pinipilit ng katawan na ilabas ito sa pamamagitan ng pag-ihi, kaya’t madalas kang naiihi at nauuhaw. Dahil hindi naa-absorb ng katawan ang glucose ng maayos, lagi kang nakakaramdam ng gutom at pagod, kahit kakakain mo lang.
Pansin mo rin bang pumapayat ka kahit normal ang kain mo? Isa rin ito sa senyales ng type 1 diabetes, kung saan ang katawan ay hindi gumagawa ng sapat na insulin.
Bukod pa rito, bantayan ang malabong paningin, mabagal na paggaling ng sugat, at pangangalay o pamamanhid ng kamay at paa, dahil ang mga ito ay mga senyales na may kinalaman sa sirkulasyon ng dugo at nerve damage.
Paalala: hindi lahat ng may diabetes ay agad nakakaramdam ng sintomas. Kaya mahalaga ang regular na check-up at blood sugar test, lalo na kung may lahi kayo ng diabetes.
—Sa panulat ni Jem Arguel
