Hiniling ng Department of Justice sa Korte Suprema na huwag pagbigyan ang inihaing petition for habeas corpus ng magkakapatid na Duterte.
Batay sa sagot ng DOJ na siyang kumatawan para sa pamahalaan, moot o wala nang saysay at kulang na sa merito ang mga petisyon para ibalik sa bansa si dating Pangulong Rodrigo Duterte na inilipad patungong the Hague, Netherlands noong Marso 11.
Naniniwala rin ang justice department na hindi maaari ang habeas corpus dahil para lamang ito sa mga iligal na ikinulong, taliwas sa kaso ng dating presidente na may umiiral na warrant of arrest.
Una nang kinumpirma ni Justice Secretary Jesus Crispin Remulla na DOJ ang kakatawan para sa respondents na kinabibilangan niya mismo, at nina Executive Secretary Lucas Bersamin, Interior Secretary Jonvic Remulla, at PNP Chief Gen. Rommel Marbil matapos umatras si Office of the Solicitor General, Menardo Guevarra. —sa panulat ni Laica Cuevas
