Umapela si Senador Panfilo Lacson sa Department of Interior and Local Government o DILG na papanagutin ang mga barangay officials na sinasamantala ang nalalapit na pagpapasara sa Boracay island.
Ayon kay Lacson, may mga sumbong na umabot sa kanya na may ilang opisyal ng barangay ang humihinge ng 400,000 pesos mula sa mga business owner kapalit ang pagbibigay ng ID sa kanilang mga empleyado na hindi residente ng isla.
Hinamon niya ang ahensya na magsagawa ng counter intelligence sa naging impormasyon o kaya naman ay entrapment operation laban sa naturang mga opisyal.
Ipatutupad sa isla ng boracay ang No ID , No Entry policy habang ginagawa ang anim na buwang rehabilitasyon sa isla.
Samantala, itinanggi naman ng isa sa mga barangay official ng isla ng Boracay, Aklan ang mga ulat na humihingi sila ng pera sa mga business owner kapalit ng mga identification card para sa kanilang mga empleyado.
Ayon kay Barangay Chairperson Lilibeth Sacapano, dapat pangalanan ng mga may nalalaman umanong extortion activities ang mga nangingikil sa halip na manisi ng mga opisyal sa Boracay.
Kung personal aniyang magtutungo sa kanilang tanggapan ang mga nag-aakusa ay madali lamang naman ang pagkuha ng barangay ID lalo’t kung mahigit anim na buwan ng nasa isla ang mga empleyado kaysa magpakalat ng kasinungalingan.
Ipinaliwanag ni Sacapano na kailangan lang mag-presenta ng certificate of employment ang sinumang empleyado bilang patunay na nagtatrabaho sila sa isla sa nakalipas na anim na buwan.
—-