Mananatili pa ring bukas ang lahat ng uri ng transportasyon sa Metro Manila sa gitna ng muling pagsailalim nito sa enhanced community quarantine (ECQ).
Sa inilabas na kautusan ng transportation department, magpapatuloy pa rin ang operasyon ng pampublikong transportasyon para lamang sa mga Authorized Persons Outside Residence (APOR).
Ayon kay transportation Secretary Arthur Tugade, lahat ng umiiral na restriksyon kontra COVID-19 ay ipatutupad sa lahat ng mga APOR na sasakay ng pampublikong transportasyon.
Kasunod nito, pinaalalahanan ni Tugade ang mga APOR na ihanda ang kanilang mga ID o anumang dokumentong patunay na pinapayagan silang makalabas ng bahay at iprisenta sa mga transport marshal.
Sa mga public utility vehicles (PUVs) tulad ng mga bus at jeepneys ay pinapayagan ang 50% na passenger capacity, bawal ang standing o mga nakatayong pasahero at dapat may pagitan sang-ayon sa social distancing.