Posibleng nakalabag sa konstitusyon si Pangulong Rodrigo Duterte nang tawagin nitong estupido ang Diyos.
Ito ang naging komento ng pinatalsik na si dating Chief Justice Maria Lourdes Sereno matapos ng kontrobersyal na birada ng Pangulo kontra sa Simbahang Katolika.
Ayon kay Sereno, partikular na nalabag ng Pangulo ang diwa ng preamble sa Philippine Constitution.
Iginiit ni Sereno, bahagi ng responsibilidad ng isang Pangulo ang ipagtanggol ang Constitution na naglalaman din ng pananalig at panalangin sa makapangyarihang Diyos.
Dagdag pa ng dating Punong Mahistrado, hindi dapat pinaghahati-hati ng Pangulo ang taumbayan sa pagsasabing perpekto ang kanyang Diyos at ang sa iba ay hindi posibleng nangangahulugan itong siya lamang ang tama.
Gayunman, sinabi ni Sereno na hindi siya tiyak kung ang nasabing paglabag ay maituturing na impeachable offense.
—-
