Iginiit ni presidential son at House Majority Leader Sandro Marcos na pawang kasinungalingan, iresponsable, walang basehan, walang katotohanan at walang magandang idudulot sa bayan ang mga alegasyon ng kaniyang tiyahin na si Senator Imee Marcos laban sa kanya at sa kanyang magulang na sina Pangulong Ferdinand Marcos Jr. at First Lady Liza Araneta Marcos.
Ginawa ni Cong. Marcos ang pahayag makaraang sabihin ni Senator Imee sa rally ng INC o Iglesia ni Cristo na gumagamit ng ilegal na droga si PBBM, First Lady, at pati silang mga anak.
Ayon kay Cong. Marcos, hindi asal ng isang tunay na kapatid ang ipinakita ni Senator Imee at nakakalungkot ang pagtatraydor nito sa kanilang pamilya.
Aniya, nirerespeto niya ang kaniyang tiyahin at may malaking papel sa pagsisimula ng kanyang buhay bilang isang public servant.
Masakit para kay Rep. Marcos na humantong sa matinding pagsisinungaling si Senator Imee para sa layunin nitong ibagsak ang gobyerno at isulong ang ambisyon sa politika.
Bunsod nito ay nananawagan si Rep. Marcos sa mamamayang Pilipino na magkaisa at magtulungan para sa katotohanan at huwag nang palakihin ang mga hindi totoong kwento o kasinungalingan para magpalaganap ng gulo at destabilization.
