Nagbabala ang Commission on Elections sa mga kandidato sa nalalapit na Barangay at Sangguniang Kabataan Elections laban sa paggamit ng ayuda at iba pang programa ng pamahalaan bilang bahagi ng kanilang pangangampanya.
Ayon kay COMELEC Chairman George Erwin Garcia, hindi dapat gamitin ang pondo ng bayan para sa pansariling interes sa politika.
Samantala, nilinaw ni Chairman Garcia na maaari pa ring ipagpatuloy ng mga lokal na pamahalaan ang ilang programa, ngunit kailangan muna ng exemption mula sa COMELEC para sa malalaking financial assistance gaya ng Assistance to Individuals in Crisis Situation at Ayuda para sa Kapos ang Kita Program.
Binigyang-diin ng COMELEC na hindi dapat makita ang sinumang kandidato sa payout ng mga naturang programa, at kahit isang larawan lamang sa payout site ay maaari nang magsilbing ebidensya sa kasong disqualification.
Bukod dito, nagpatupad din ang COMELEC ng 10-day absolute ban sa halos lahat ng pampublikong financial assistance bago ang araw ng halalan, at tanging emergency medical assistance at burial assistance lamang ang papayagang maipagpatuloy sa ilalim ng itinakdang exemption. | Sa panulat ni Reabelle Medina
