Hawak na ng pulisya ang kuha sa CCTV camera na uubrang makatulong sa imbestigasyon hinggil sa pagpatay kay Judge Wilfredo Nieves ng Malolos, Bulacan.
Tumanggi munang i-detalye ng mga otoridad ang mga impormasyong nakuha na nila hinggil sa nasabing kaso bagamat mayroon na umanong anggulong pinupursige ang mga imbestigador na unti-unting nagbibigay-linaw sa kaso.
Tiniyak ng mga otoridad ang patuloy na pangangalap ng mga impormasyon na tutukoy sa suspek at motibo sa pagpaslang sa hukom.
Kaugnay nito, walang nabanggit sa kaniya ang hukom na anumang banta sa buhay nito nang huli niyang makausap, ilang araw bago ang pananambang.
Ayon ito kay Oriental Mindoro Representative Reynaldo Umali, isa sa mga dumalaw sa burol ni Nieves.
Mabait aniya at sadyang kampante sa kaniyang seguridad si Nieves kahit may mga malalaking kasong hawak ito.
Samantala, tumanggi namang magsalita ang maybahay ni Nieves sa posibleng nasa likod nang pagpatay sa kaniyang asawa.
Sa halip, nanawagan na lamang si Ginang Nieves sa Pangulong Benigno Aquino III na mabigyan ng hustisya sa lalong madaling panahon ang pagkamatay ng kaniyang mister.
By Judith Larino